Senza dubi, las colurs tgietschen e blau dil logo dil NABALugano2018 muossan clar e bein, nua che quella occurrenza filatelica impurtonta ha liug, numnadamein el Tessin. Igl acronim NABA perencunter fa nunconfundiblamein attent ch'ei setracta dad in eveniment naziunal. Ins ha pia mai mess en discussiun da midar il num. Nus essan loschs da far part dalla Svizra, e quei buca mo igl emprem d'uost e buca mo cun plaids. Alla fin finala han nos perdavons proclamau gia igl onn 1798 e propi a Lugano dad ault e clar "Liberi e Svizzeri", libers e Svizzers. Nus essan aunc adina d'accord cun nos antenats, silmeins en quei grau, schegie che las noziuns dattan caschun a differentas interpretaziuns per part cuntrastontas. La libertad da saver esser auters – ed era che las diversas modas dad esser Svizzer vegnan acceptadas da tuts – unescha e vegn era egl avegnir ad unir nus fermamein. Consequentamein san ins leger en quei catalog rapports els quater differents e (gest perquei) bials lungatgs naziunals. Nus discurrin buca tuts il medem lungatg. Sin scalem filatelic capin e respectein nus denton in l'auter: ils prefilatelists, ils giuvens, ils tradiziunalists, ils tematichers ed era quels che s'interesseschan per la historia dalla posta. La filatelia unescha bia pli fetg ch'il sport decantau aschi savens. Ni haveis Vus gia viu ina ga ch'in expositur ha stuiu bandunar il plaz ni ha survegniu ina carta cotschna?